هي فاتنة قلبي وقلبي لها صار
أحب ذيك البنت وآموت فيها .. ولعْيونها أسلك مساليك الأخطار
بالصدق ألملمها غلا واحتويها .. واصبها عشق وأحاسيس واشعار
مدري بلتني أو أنا مبتليها ؟!.. بس الوكاد أعشقها بجنون ماصار
القلب من بين البني منتقيها .. زهرة بعيني فارقه كل الأزهار
أبدا بها جْنان وجنون أنتهيها .. تحيلني غيمٍ واخايل لها أمطار
أروح عنْها ثم أعوّد واجيها .. ولهان والأشواق تصهرني إصهار
إذا أبعدَت صوّت حنيني يبيها .. واذا قربت تشعل سما ليلي أقمار
شربتها عشْق وعجزْت أرتويها .. مثل البحر ماترتوي منْه الازوار
الجود كل الجود مدّة يديها .. والطيب كل الطيب بكفوفها سار
والحسْن كل الحسْن منْها إليها .. والنور كل النور من نورها غار
الورد كنّه لامشت ينتخيها .. تضفي على ألوانه نعومة وتذكار
وكن العطر سرْبٍ توافد عليها .. تجود له بأنفاسها سحْر واسرار
إذا اقبلت يمّي وانا أحتريها .. تزهر بساتين المشاعر بالاشعار
أسكر بها عشق وغلا وانتشيها .. واصحى بها حرفٍ له حضور إلى ثار
المهرة اللي صعْب أحَد يمتطيها .. إلا مروّضها إذا باصبعه شار
يالله عساني بكل شي أفتديها .. بْحالي ومالي وغضّات الأعمار
هي ( فاتنة ) روحي وروحي تبيها .. هي ( فاتنة ) قلبي وقلبي لها صار